ముంబైలో సెక్స్ రాకెట్ గుట్టు రట్టు... ముగ్గురు మహిళా ఆర్టిస్టులను కాపాడిన పోలీసులు!

ముంబై నగరంలోని ఓ త్రీ స్టార్ హోటల్ లో గుట్టుగా సాగుతున్న హై ప్రొఫైల్ సెక్స్ రాకెట్ ను ఛేదించిన పోలీసులు, ఓ మైనర్ నటి సహా ముగ్గురిని రక్షించారు. వీరందరినీ ప్రియా శర్మ (29) అనే యువతి బలవంతంగా వ్యభిచార రొంపిలోకి లాగిందని పోలీసులు వెల్లడించారు. మరిన్ని వివరాల్లోకి వెళితే, సిటీ పోలీసు స్పెషల్ బ్రాంచ్ విభాగానికి తూర్పు అంధేరీ ప్రాంతంలోని హోటల్ లో వ్యభిచారం జరుగుతున్నట్టు సమాచారం అందింది. కందివ్యాలీలో టూర్స్ అండ్ ట్రావెల్స్ నిర్వహిస్తున్న ప్రియాశర్మ, ఈ మొత్తం సెక్స్ రాకెట్ లో ప్రధాన సూత్రధారని గుర్తించారు. హోటల్ పై దాడి చేయాలని పక్కా ప్లాన్ వేశారు.

ప్రియా శర్మను ట్రాప్ చేసిన పోలీసులు, ఆమె, ముగ్గురు ఆర్టిస్టులతో హోటల్ లో ఉన్న సమయంలో దాడులు జరిపారు. ఓ టీవీ చానెల్ క్రైమ్ షోలో యాంకర్ గా ఉన్న యువతి, ఓ వెబ్ సీరీస్ లో నటించిన మైనర్ బాలిక, మరాఠీ చిత్రాలు, సీరియల్స్ లో రాణిస్తున్న ప్రముఖ నటిని ప్రియా శర్మతో ఉండటాన్ని చూసి, వారిని రెస్క్యూ హోమ్ కు తరలించారు. ప్రియా శర్మను రిమాండ్ కు పంపినట్టు తెలిపారు. కాగా, ముంబయిలో ఇదే తరహా సెక్స్ రాకెట్ నడిపిస్తున్న బాలీవుడ్ ప్రొడక్షన్ మేనేజర్ ఒకరిని ఇటీవల పోలీసులు అరెస్ట్ చేసిన సంగతి తెలిసిందే.